|
|
Офтоб аз қуллаҳо сар мезанад,
Ёди он дидори дилбар мекунам.
Хомаамро дар шафақҳои гулоб
Бо хаёли рӯи ӯ тар мекунам.
Расми хокиро ба се ранги баланд -
Рангҳои осмон сар мекунам.
Софии чашмони ӯро, чун саҳар
Гоҳ анвар, гоҳ ахзар мекунам.
Баъд меорам фуруд аз осмон -
Моҳро бо ӯ баробар мекунам.
Сурати ӯро чу шеъре баъд аз ин
Рӯз мехонам, шаб азбар мекунам.
Лек чун ояд, нишинад дар барам,
Ҳар чӣ гуфтам, боз дигар мекунам.
Баъди чандин рангҳою ранҷҳо
Ман ба ҳусни хок бовар мекунам.
1965
|
|
