|
|
Мо аз ин дарё ба он дарё яке руде кушодем,
Рӯдбори зиндагиро мо зи нобудӣ кушодем.
Ин хати марзи ватанро бо хати обӣ кашидем,
Хобҳои обҳоро мо зи бехобӣ кашидем.
Новадонҳо зери парчамҳои обиву гулобӣ,
Бодбонҳо - болҳои осмониву саҳобӣ.
Нохудои мо бувад дӯшизае дар порсоӣ,
Дасти Яздон бар сараш боли ҳумоӣ.
Тангии Ҳурмуздро бо вусъати дилҳо кушодем,
Ин раҳи наздикро бар рағми ғофилҳо кушодем.
Новадонҳо бигзарад аз обҳою бодҳояш,
Мо кушодему супоридем дар амри худояш.
То ки Юнонӣ ба Ҳиндустон барад армони моро,
Ҳафт кишвар гӯш дорад даъвату фармони моро.
Ҳафт кишварро дуруду ҳафт кишварро сипос,
Маснади Маздои поку покгавҳарро сипос!
1995.
|
|
