|
|
Аз Рустами фасона то Рустами замона
Ҳиммат гузору бигзар бо гоми рустамона,
То аз забони килкат оташ кашад забона.
Гурзи гарони Рустам бигзор бар канора,
Онро пазир, шоир, як пора истиора,
Имрӯз тирбор аст ҳамвора моҳвора.
Наъра мазан чу Рустам, сайёра ҳамчу гӯш аст,
Ё худ фазои олам бонки суханфурӯш аст.
Он ки паём орад, Ҷабрил ё Сурӯш аст.
Магзар зи кори Рустам, бигзар зи ҳафт хонаш,
Дар дасти хасм афтод ҳам Рахш, ҳам инонаш,
Деви сапед бинӣ имрӯз гирди хонаш.
Кори сиёҳ бинӣ дар кишвари каёнаш,
Сад хасми мурда бинӣ имрӯз дар зиёнаш.
Пар монду фар намонда имрӯз дар камонаш.
Рустам зи шаҳри Кобул рӯзе ки рафт берун,
Хушкид рӯди Кобул, ҷорист рӯди Ҷайҳун.
Хун медамад зи ҳомун, хун мечакад зи гардун.
1996
|
|
